Oktyabrın 5-də Böyük Quruluş Partiyasından prezidentliyə namizəd Fazil Mustafayev Şirvanda seçicilərlə görüş keçirib. APA-nın Mil-Muğan bürosunun məlumatına görə, görüşdə Fazil Mustafayev seçicilərə seçki platforması barədə məlumat verib, onların suallarını cavablandırıb.

Namizədin çıxışı, əsasən, Azərbaycanın neft ölkəsindən rifah ölkəsinə çevrilməsi ruhunda olub. Görüşü ATƏT nümayəndələri də müşahidə edib. /APA/

Oktyabrın 15-də keçiriləcək prezident seçkilərində müşahidə aparmaq məqsədi ilə Mərkəzi Seçki Komissiyasına (MSK) müraciət üçün müəyyən edilmiş müddət başa çatıb. Bu barədə APA-ya MSK-nın mətbuat xidmətinin rəhbəri Azər Sarıyev məlumat verib. Onun sözlərinə görə, MSK-nın qəbul etdiyi Təqvim Planına görə, müşahidəçilərin qeydiyyatı səsverməyə 10 gün qalana kimi davam edir. MSK-da qeydiyyatdan keçən şəxslər ölkə ərazisində istənilən seçki dairəsində və seçki məntəqəsində müşahidə aparmaq hüququna malikdirlər. A. Sarıyev bildirib ki, MSK-ya müraciət edən yerli və xarici müşahidəçilərin hamısının müraciətinə baxılmadığından yekun nəticə hələlik bəlli deyil. Sonuncu hesablamaya görə mindən çox şəxs MSK-da qeydiyyatdan keçib.

A. Sarıyev Dairə Seçki Komissiyalarında müşahidəçilərin qeydə alınmasının səsverməyə 5 gün qalana kimi davam edəcəyini bildirib. /APA/

Ukraynanın Azərbaycandakı fövqəladə və səlahiyyətli səfiri Boris Klimçuk bu gün Mərkəzi Seçki Komissiyasının (MSK) sədri Məzahir Pənahovla görüş keçirib. MSK-nın mətbuat xidmətindən APA-ya daxil olan məlumata görə, səfir oktyabrın 15-də keçiriləcək prezident seçkilərinə hazırlıq vəziyyəti ilə maraqlanıb. MSK sədri isə seçkilərə hazırlıqla bağlı həyata keçirilən tədbirlər, seçki komissiyalarının fəaliyyət prinsipləri və s. vacib seçki məsələləri barədə məlumat verib. Görüşdə həmçinin, Azərbaycan və Ukrayna MSK-ları arasında əməkdaşlıq barədə memorandumun imzalandığı qeyd olunub və komissiyaların altı ildir ki, bu sənədə uyğun olaraq təcrübə mübadiləsi apardıqları bildirilib. /APA/

Prezidentliyə namizəd Qüdrət Həsənquliyevin APA-ya müsahibəsi

- Təbliğat kampaniyası necə gedir?

- Kampaniya normal gedir. Lakin bizim təbliğat imkanlarımız iqtidar nümayəndəsi ilə müqayisədə məhduddur. Azərbaycan dövlət televiziyası hazırda Seçki Məcəlləsini pozaraq, yalnız prezidentin təbliğatı ilə məşğul olur. Düzdür, Seçki Məcəlləsində qeyd olunub ki, prezident kampaniya dövründə öz səlahiyyətlərini davam etdirir, deməli, onun prezident kimi fəaliyyəti də işıqlandırılmalıdır. Amma dövlət televiziyası hazırda sırf təbliğatla məşğul olur. Mən və daha bir neçə prezidentliyə namizəd də parlamentdə deputat kimi çıxış edirik, amma dövlət televiziyası bizimlə bağlı adi bir görüntü belə vermir.

Həmçinin, məqsədyönlü şəkildə parlamentdəki iqtidar çoxluğu Mərkəzi Seçki Komissiyasını formalaşdırmadı. Mən bu məsələni Milli Məclisdə də qaldırdım, qanunda da əks olunub ki, azlıqda qalan partiyalar MSK-ya 6 nümayəndə təyin edə bilər. Bir nəfər isə bitərəflərin nümayəndəsi kimi razılaşdırılır. Lakin bu heç də belə olmadı, iki yer boş saxlanıldı. Milli Məclisin birinci vitse-spikeri Ziyafət Əsgərov isə ictimaiyyətə yanlış informasiya verərək, guya bizim öz aramızda razılaşa bilmədiyimizi söyləyir. Halbuki, digər 4 yerə üzv təyin olunanda da hər hansı razılaşma əldə olunmamışdı.

Başqa bir nöqsan isə İctimai Televiziyada bizə ayrılan pullu efir vaxtı ilə bağlıdır. Qanunda göstərilib ki, pullu efir vaxtı pulsuz efir vaxtı qədər və ya ondan iki dəfə çox ola bilər. Bizdə isə 4 namizədə 5 dəqiqəlik efir vaxtı ayrılır.

Digər televiziyalar isə seçki təbliğatı prosesində ümumiyyətlə iştirak etmirlər. Yalnız ANS bu prosesə qoşulub. Bu televiziya isə yalnız reklam çarxları yayımlayır, çıxış üçün efir vaxtı ayırmır.

- Yerlərdə təbliğat kampaniyasının aparılması üçün şərait necədir? Məsələn, plakatlar cırılırmı və ya seçicilərlə görüş üçün yerlər ayrılırmı?

- Kütləvi olaraq, plakat cırılması halı yoxdur. Sadəcə, bir-iki yerdə xuliqanlıq faktı kimi belə hallar qeydə alına bilər. Amma bu çox epizodikdir. Seçicilərlə görüşlər üçün də normal şərait var. Daha doğrusu, bu şərait yerlərə görə dəyişir. Məsələn, mənim Qusar və Xaçmazda seçicilərlə görüşüm üçün rayon mərkəzlərində çox gözəl yerlər ayrılmışdı. Göyçayda da zalın vəziyyəti yaxşı idi, amma mərkəzdən uzaqda idi. Lənkəranda isə həm yer bərbad idi, həm də çox uzaq idi. Lənkəranda görüşün baş tutmamasına da çalışıldı. Amma digər rayonlarda belə hallar olmayıb.

- Seçki kampaniyası dövründə paytaxtda mitinq keçirməyi planlaşdırırsınızmı?

- Bəli, hava şəraitindən asılı olaraq, ya mitinq, ya da qapalı görüş keçirməyi nəzərdə tuturuq. Artıq görüş keçirmək üçün müraciət də etmişik. Müraciətdə Opera və Balet Teatrının binasını istəmişik.

- Bu seçki kampaniyası ilə bağlı ölkədə çox fərqli fikirlər var. Kampaniyanın sakit keçməsi əsas müzakirə mövzularından biridir. Necə hesab edirsiniz, seçki belə olmalıdır, yoxsa daha böyük hay-küyə ehtiyac var?

- Bu mülahizələrin ortaya çıxmasının çox səbəbi var. Əvvəla, bu seçkiyə elektron informasiya vasitələrinin ayırdığı vaxt çox azdır. Bu KİV-lərin seçki təbliğatdakı rolu çox zəifdir. Müxalifətdən olan namizədlərin efir imkanları isə xeyli məhduddur. İkincisi, hər seçkidə ölkənin seçki sivilizasiyasına uyğunlaşması bir az daha artır. Yəni, sözü qışqıra-qışqıra deyil, sakit tərzdə, real formada deməyi öyrənənlərin sayı artır.

Məsələn, mən bizim partiyadan başqa öz platformasını ortaya qoyan ikinci namizədə rast gəlmirəm. Bəzi namizədlər yalnız sual verir, olan problemləri sadalayırlar, YAP-dan olan vəkillər isə ancaq tənqidlərə cavab verir və görülmüş işlərdən danışırlar. Bizdən başqa, ölkədəki mövcud problemlərin köklü, fundamental həlli yolları ilə bağlı ortaya variant qoyan ikinci partiya yoxdur. Bizim platformamızda Konstitusiya, səhiyyə və təhsil islahatları, Dağlıq Qarabağ problemi, iqtisadi sahə ilə bağlı bütün görüşlər öz əksini tapıb. Məsələn, biz deyirik ki, yanvar ayının birindən pensiyaçılar 500, müəllimlər və həkimlər 600 manat alacaq. Hər yeni doğulan uşağa görə, ailələrə 5000 manat veriləcək. Biz deyirik ki, regionların inkişafı üçün yaradılacaq istehsal və emal müəssisələri 2 il vergidən azad olunacaq. Bu gün regionlarda tikilən idman kompleksləri və diaqnostika mərkəzləri üçün dövlət büdcəsindən 1 manat belə sərf olunmayacaq. Biz bu işləri müsabiqə yolu ilə həll edəcəyik. Bu, bizim platformamızın bir hissəsidir və əgər seçicilər bizim dediyimiz prizmadan buna yanaşsalar, inanıram ki, bizə səs verəcəklər.

- Namizədliyinizi kiminsə xeyrinə geri götürmək fikriniz yoxdur ki?

- Xeyr, sona qədər mübarizə aparacağam. /APA/

Avropa İttifaqının (Aİ) Cənubi Qafqaz üzrə xüsusi nümayəndəsi Piter SemnebiAzərbaycandakı seçkiqabağı vəziyyəti öyrənir.
Bazar ertəsi Aİ xüsusi nümayəndəsinin Azərbaycanın rəsmi şəxsləri, siyasi partiyalar və vətəndaş cəmiyyətinin nümayəndələri ilə görüşləri başlayıb.
Semnebinin seçkiqabağı vəziyyətlə tanış olması üçün Azərbaycan XİN və MSK-da görüşləri planlaşdırılıb. /Trend/

Azərbaycanın müxalif Milli İstiqlal Partiyası (AMİP) prezident seçkilərində namizədi ilə iştirak etməsə də, səsvermə prosesini müşahidə edəcək. Bu məlumatı Trend News-a bazar ertəsi AMİP-in mətbuat və təbliğat katibi Əli Orucov verib.

«Seçkiləri müşahidə etmək üçün bir müddət əvvəl rayon təşkilatlarına müvafiq dairələrdə qeydiyyatdan keçmək üçün tapşırıq verilib. Son məlumatlara görə, artıq partiya ölkə üzrə seçki dairələrinin 90 faizindən çoxunda müşahidə imkanı qazanıb», - Orucov bildirib.

AMİP funksionerinin sözlərinə görə, seçkilərdə müşahidəçi qismində iştirak etməklə həm seçki prosesini yaxından izləmək, həm də yol veriləcək qanunsuzluqlar barədə daha ətraflı məlumat toplamaq imkanı qazanacaqlar. /Trend/

Ümumrusiya Azərbaycanlıları Konqresi Azərbaycanda keçiriləcək prezident seçkiləri ilə bağlı Moskvada aksiya keçirib.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bazar ertəsi Trend News-a verilən məlumata görə, konqresin prezidenti Məmməd Əliyev aksiyada seçkilərdə Azərbaycan diasporunun fəal iştirakı üçün gördüyü işlərdən danışıb.

«Konqresin regional təşkilatlarının liderləri prezident seçkilərində fəal iştirak etməyə hazır olduqlarını bildiriblər», - Əliyev deyib.

Tədbirdə seçkilərdə iştiraka dair müraciət qəbul olunub. Müraciətdə prezident İlham Əliyevin 5 il ərzində Azərbaycan dövlətinin hərtərəfli inkişafı və beynəlxalq aləmdə nüfuzunun artırılması, eləcə də Azərbaycan-Rusiya münasibətlərinin daha da möhkəmlənməsinə verdiyi töhfələr, Rusiyada yaşayan soydaşlarımızın hüquqlarının qorunması, onların problemlərinin həlli, Rusiyadakı Azərbaycan diasporunun təşkilatlanması, keyfiyyətcə daha yüksək mərhələyə qədəm qoyması məqsədilə gördüyü işlərdən bəhs olunur.

Sənəddə qeyd edilir ki, Ümumrusiya Azərbaycanlıları Konqresinin Rəyasət Heyəti Rusiyadakı 2 milyonluq Azərbaycan diasporunun İlham Əliyevin prezidentliyə namizədliyini dəstəklədiyini bildirir və bu ölkənin ərazisində yaşayan, işləyən, təhsil alan bütün Azərbaycan vətəndaşlarını seçkilərdə fəal iştirak etməyə çağırır. /Trend/

«Azərbaycanda Vətəndaş Cəmiyyətinin Inkişafına Yardım Assosiasiyası» (AVCİYA) Seçki Qərargahı Prezident seçkiləri ərəfəsi Respublikanın 12 regional mərkəzində müşahidəçilərə treninqləri başa vurduqdan sonra Bakı rayonları, Abşeron və Sumqayıt müşahidəçiləri üçün treniqlərə başlayıb. 4-12 oktyabr 2008 – ci il tarixlərini əhatə edən treninqlər zamanı müşahidəçilərə AVCİYA Seçki Qərəgahının hazırladığı “2008 – ci il Prezident seçkilərinin Monitorinqi. Yaddaş kitabçası”, seçki günü lazım olan materiallarla təmin olunmuş qovluqlar təqdim olunur.
Seçki Qərargahı Prezident seçkiləri ərəfəsi iş planına uyğun olaraq öz fəaliyyətini daha da genişləndirir.

Bu gün Azərbaycanda Vətəndaş Cəmiyyətinin İnkişafına Yardım Assosiyası (AVCİYA) Seçki Qərargahının rəhbəri Məhərrəm Zülfüqarlı Prezidentliyə namizəd İqbal Ağazadə ilə görüşüb.

İqbal Ağazadə AVCİYA ilə əmədaşlıq edən ELS təşkilatının keçirdiyi rəy sorğusu barədə fikirini bildirmiş, seçki kampaniyasının gedişi, keçirdiyi görüşlər, seçki təbliğatı barədə məlumat vermiş və təbliğat materialları ilə AVCİYA rəsmisini tanış etmişdir.

M. Zülfüqarlı Assosiasiyanın Prezident seçkiləri ilə əlaqədar gördüyü işlər və gələcək fəaliyyəti barədə qısa məlumat verib.

Görüşün sonunda M. Zülfüqarlı Prezidentliyə namizədi AVCİYA – nın 9 oktyabr 2008 – ci il tarixdə kecirəcəyi Dəyirmi Masaya dəvət etmişdir.

Azərbaycanın müxalif Müsavat Partiyası Azərbaycan Demokrat Partiyası ilə hansısa blokda birləşməsini mümkün saymır.
«Müxalifətdə olan siyasi partiyaların əməkdaşlığını və imkan daxilində müttəfiqliyini dəstəkləyirik, ancaq yaxın zamanlarda bizim Azərbaycan Demokrat Partiyası ilə hansısa blokda birləşməyimiz real görünmür», - cümə günü TrendNews - a Müsavat Partiyası Mərkəzi İcra Aparatının rəhbəri Arif Hacılı bildirib.

Hacılı ADP - nin prezident seçkilərinə münasibətinin Müsavatdan tamamilə fərqli olduğunu qeyd edib.

«Bütövlükdə Azərbaycan hakimiyyətinin siyasəti ilə əlaqədar ADP - nin mövqeyi Müsavat Partiyasının mövqeyindən əsaslı surətdə fərqlənir. Bu fərq o qədərdir ki, iki partiyanın müttəfiqliyi mümkün deyil», - Hacılı bildirib

Müsavatın Mərkəzi İcra Aparatının rəhbəri, yalnız iki partiyanın siyasətində daha yaxın çalarlar aşkara çıxdığı təqdirldə əməkdaşlığı, hətta ciddi blok yaradılmasını mümkün hesab edir. /Trend/

Azərbaycanın xarici ölkə səfirliklərində ölkədə keçiriləcək prezident seçkisi ilə əlaqədar seçki məntəqələri yaradılıb.
«Azərbaycanın xarici ölkə səfirliklərinin 33- də seçki məntəqələri yaradılıb və həmin məntəqələrin lazımi avadanlıqlarla təmin olunması başa çatdırılıb», - deyə cümə günü Trend News - a Mərkəzi Seçki Komissiyasının (MSK) beynəlxalq əlaqələr şöbəsinin müdiri Rövzət Qasımov məlumat verib.

Qasımovun sözlərinə görə, ABŞ, Rusiya, İran, Türkiyə, Avropanın bəzi ölkələrindəki səfirliklərdə yaradılmış seçki məntəqələrində 10 mindən çox azərbaycanlı seçicisinin səs verməsi gözlənilir. «Xaricdə yaşayan azərbaycanlılar üçün ayrılmış seçki bülletenləri və protokollar MSK tərəfindən Xarici İşlər Nazirliyinə təqdim olunub və yaxın günlərdə Nazirlik tərəfindən sənədlər səfirliklərə çatdıralacaq»,- deyə o bildirib.

Azərbaycanın Seçki Məcəlləsinə əsasən, hər hansı bir xarici ölkədə yaşayan Azərbaycan vətəndaşlarının sayı 50 - dən azdırsa, həmin ölkədə seçki məntəqəsi təşkil olunmur. /Trend/

Azərbaycan müxalifətini təmsil edən Müasir Müsavat Partiyasının sədri, prezidentliyə namizəd Hafiz Hacıyev bildirib ki, cümə günü bir qrup şəxs onunun rəhbərlik etdiyi siyasi təşkilatın mərkəzi qərərgahına hücum edib. «Mən İctimai Televiziyada çıxış edən zaman bir necə məmurun rüşvət almaqla məşğul olduqlarını vətəndaşlara çatdırıram. Bizim qərargaha hücum edən şəxsləri adını çəkdiyim məmurlar göndəriblər» - cümə günü Trend News-a Hacıyev bildirib. Onun sözlərinə görə, bir qrup şəxs partiyanın qərargahının yerləşdiyi əraziyə gəlib və icəri daxil olmağa cəhd göstəriblər. Lakin qərargahın qapıçısı onların içəri daxil olmasına imkan verməyib: «Onlar «Hafiz Hacıyevə ölüm!» şüarı səsləndiriblər və məqsədləri məni öldürməkdir. Bu barədə bəzi xarici ölkələrin səfirlərinə də məlumat vermişəm. Lakin mən mövqeyimdən geri çəkilən deyiləm». Prezidentliyə namizəd qeyd edib ki, hadisə ilə bağlı hüquq - mühafizə orqanlarına müraciət etməyi planlaşdırmır. O, bunu hüquq - mühafizə orqanlarına inanmaması ilə izah edib: «Öz adamlarımın hesabına təhlükəsizliyimi gücləndirmişəm». Müasir Müsavat Partiyası özünü iqtidara qarşı konstruktiv müxalifət hesab edir. /Trend/