 Azərbaycanda namizədlər prezident seçilərlərsə, imzalayacaqları ilk qərarı müəyyənləşdiriblər. Trend News-un cümə günü apardığı sorğu nəticəsində məlum olub ki, prezidentliyə namizədlərin əksəriyyəti bu vəzifəyə seçilərlərsə, ilk olaraq əhalinin sosial təminatının yaxşılaşdırılması ilə bağlı sərəncam imzalamağı planlaşdırırlar. Müxalifəti təmsil edən Müasir Müsavat Partiyasının sədri, prezidentliyə namizəd Hafiz Hacıyev bildirib ki, prezident seçilsə, ilk sərəncamı müəllimlərin, həkimlərin, mədəniyyət işçilərinin, əlillərin, şəhid ailələrinin, müharibə veteranlarının və digər az təminatlı ailələrin komunal xərclərdən və vergilərdən azad edilməsi ilə bağlı olacaq. | 
Azərbaycanda keçiriləcək prezident seçkisini boykot edən Müxalifətin Əməkdaşlıq Mərkəzinə daxil olan müxalifət partiyaları seçiciləri səsvermədə iştirak etməməyə çağırıb.
Açıq Cəmiyyət Partiyası (ACP) prezident seçkilərini müşahidə edəcək. Partiya sədrinin müavini Nizami Məmmədov APA-ya bildirib ki, 20-dən artıq ACP üzvü seçki günü müşahidəçilik fəaliyyəti ilə məşğul olacaq.
“Bütöv Azərbaycan Xalq Cəbhəsi Partiyasının prezidentliyə namizədinin platforması digərlərindən fərqlənir”. Klassik Xalq Cəbhəsi Partiyasının (KXCP) sədri Mirmahmud Mirəlioğlu APA-ya açıqlamasında bildirib ki, prezident seçkisinin bu şəkildə keçirilməsinin əleyhinə olmalarına baxmayaraq, mətbuat vasitəsilə namizədlərin platforması ilə tanış olub.
“Azərbaycanda keçirilən prezident seçkilərinin sönük keçirilməsi haqqında danışmaq ədalətsizlikdir və reallığı təhrif etməkdən başqa bir şey deyil”. APA-nın məlumatına görə, bu sözləri Yeni Azərbaycan Partiyasının (YAP) sədr müavini, prezidentliyə namizəd İlham Əliyevin vəkili Əli Əhmədov partiyanın rəsmi saytına verdiyi müsahibədə deyib.
MDB icra katibi Sergey Lebedev Azərbaycanda prezident seçkilərinə hazırlıq prosesi ilə tanış olmağa başlayıb. MDB müşahidə missiyasından APA-ya verilən məlumata görə, Sergey Lebedev bu gün Sumqayıt şəhər icra hakimiyyətində və dairə seçki komissiyalarında görüşlər keçirib.
“ELS” Müstəqil Araşdırmalar Mərkəzi və Azərbaycanda Vətəndaş Cəmiyyətinin İnkişafına Yardım Assosiyasiyası (AVCİYA) 15 oktyabr prezident seçkisi ilə əlaqədar “exit-poll” və “quik-count” tədqiqatlarını keçirməyə tam hazırdır. Belə ki, tədqiqatın keçirilməsi üçün bütün hazırlıq işləri başa çatdırılıb. “Exit-poll” və “quick-count” tədqiqatı üçün lazım olan bütün sənəd və ləvazimatlar hazırlanaraq tədqiqatın keçiriləcəyi məntəqələrə göndərilib.
Azərbaycanda keçiriləcək prezident seçkilərində Türkiyədəki Azərbaycan vətəndaşlarının səs vermələrini təmin etmək üçün Ankara səfirliyində və İstanbul konsulluğunda seçki məntəqəsi yaradılıb.
Azərbaycan parlamenti ölkənin seçki komissiyalarında boş qalan yerlərin qanunverici orqanda azlıq təşkil edən müxalifət partiyalarına verilməsi məsələsinə baxmayacaq. «Parlamentdə azlıq təşkil edən müxalifət partiyaları bu məsələ ilə bağlı öz aralarında razılığa gəlməlidirlər», cümə günü Trend News-a parlamentin birinci vitse-spikeri Ziyafət Əsgərov bildirib.
Azərbaycanda seçkiqabağı vəziyyəti normal saymaq olar. Bu qərara Avropa Şurasının Nümayəndələr Komitəsinin Demokratiya üzrə mərüzəçilər Azərbaycanda keçiriləcək prezident seçkiləri ilə bağlı AŞ-nın Fəaliyyət planının yerinə yetirilməsi ilə bağlı keçirdikləri iclasda gəliblər. 
Mərkəzi Seçki Komissiyasının internet səhifələrində 500 seçki məntəqəsində seçkinin gedişini izləmək mümkün olacaq. 
Azərbaycanın müxalif Milli İstiqlal Partiyasının (AMİP) katibliyinin iclasında partiya üzvlərinin və tərəfdarlarının prezident seçkilərində iştirakı məsələsi müzakirə olunub. 
