Avqustun 27-də Mərkəzi Seçki Komissiyasında (MSK) Prezident İlham Əliyevin “Azərbaycan Respublikasında insan hüquqlarının müdafiəsi üzrə Milli Fəaliyyət Planının təsdiq edilməsi haqqında” Sərəncamının icrası ilə əlaqədar dairə seçki komissiyalarının sədrləri üçün seçki hüququ üzrə ixtisaslaşdırılmış kurslar davam etdirilmişdir.
Bugünkü tədbiri MSK sədrinin müavini Şaitdin Əliyev açaraq, kursların təşkilinin əhəmiyyətindən danışmışdır. O bildirmişdir ki, bugünkü dinləmələrdə “Milli Məclisə seçkilərdə nəticələrin müəyyən edilməsi, yekunların yoxlanılması və təsdiqi. Milli Məclisə seçkilərin yekunlarının və səsvermənin nəticələrinin dərc olunması”, “Seçki prosesində Daxili İşlər Nazirliyi orqanlarının rolu”, “Dairə seçki komissiyalarında kargüzarlığın aparılması qaydaları. Seçki prosesində dövlət avtomatlaşdırılmış informasiya sistemindən istifadə təcrübəsi” və s. məsələlər ətrafında fikir mübadiləsi aparılacaq, DSK sədrlərinə sertifikatlar təqdim olunacaqdır.
Sonra MSK üzvü Azər Tağıyev birinci məsələ barədə məruzə oxumuşdur. Bildirilmişdir ki, mövcud qanunvericiliyə görə, seçkilərin ilkin nəticələri səsvermə günü səsvermə prosesi başa çatdıqdan bir neçə saat sonra mətbuata və ictimaiyyətə açıqlanır. Bununla yanaşı, səsvermə günü ayrı-ayrı dairə və məntəqələrdə səsvermənin gedişi, müşahidəçilərin, “exitpoll” keçirənlərin ilkin rəyləri gün ərzində Dövlət Avtomatlaşdırılmış İnformasiya Sisteminin köməyi ilə ictimaiyyətə çatdırılır. Həmçinin müxtəlif dairə və məntəqələrdə quraşdırılmış vebkameralar vasitəsilə də səsvermənin gedişatını izləmək olur.
Azər Tağıyev demişdir ki, DSK-lar ilkin nəticələri qanunda nəzərdə tutulmuş müddətdə MSK-ya təqdim edir və Mərkəzi Seçki Komissiyası protokolların tərtib olunması və digər prosedurları yoxladıqdan sonra ictimaiyyətə ətraflı məlumat verir və nəticələr rəsmi mətbuatda dərc olunur. O qeyd etmişdir ki, əfsuslar olsun ki, bəzi DSK sədrləri hələ də protokolların tərtibi zamanı müəyyən qanun pozuntularına yol verirlər ki, bu, narazılıqlara səbəb olur. Bu kursların əsas məqsədi bir daha DSK sədrlərinə, üzvlərinə, eləcə də, məntəqə seçki komissiyalarının rəhbərlərinə düzgün məlumatlar vermək, səsvermənin yekunlarının yoxlanılması, təsdiqi və protokolların tərtibi ilə bağlı Mərkəzi Seçki Komissiyasının və seçki qanunvericiliyinin tələbləri ilə tanış etmək, onların bilik və bacarıqlarını artırmaqdır.
Sonra Azər Tağıyev DSK sədrlərinin suallarını cavablandırmış, onlara uğurlar arzulamışdır.
Bugünkü tədbirdə Azərbaycan Respublikası daxili işlər nazirinin müavini, general-leytenant Oruc Zalov “Seçki prosesində Daxili İşlər Nazirliyi orqanlarının rolu” mövzusunda məruzə edəcəkdir.
Sonda dinləyicilərə sertifikatlar təqdim olunacaqdır.

AzərTAc