ATƏT-in Bakı Ofisi avqustun 24-də Bakıda keçirilən dəyirmi masada səslənən təklifləri ümumiləşdirərək qarşıdan gələn parlament seçkilərinin işıqlandırılmasına dair tövsiyələr hazırlayıb.

Tövsiyələr aşağıdakılardan ibarətdir:

- Seçki kampaniyası dövründə iki ictimai telekanal və bir ictimai radioda siyasi partiyalar və namizədlər üçün həftədə üç saatdan az olmayaraq pulsuz efir vaxtının ayrılması;

- Bu efir vaxtının üçdə bir hissəsinin debatların təşkili, digər hissəsinin isə namizədlərin çıxışları üçün nəzərdə tutulması;

- Xəbərlər proqramları, forumlar, tok-şoular və digər proqramlarda bütün siyasi partiyaların təmsilçilərinə ayrı-seçkilik olmadan yer verilməlidir;

- Ümummilli və regional özəl telekanallar seçki kampaniyasında dövründə iştirakı stimullaşdırmalı və efir vaxtı təklif etməlidir;

- Seçki Məcəlləsinin 77.1 maddəsi ləğv olunmalıdır ki, AzTV telekanalı seçki kampaniyası dövründə namizədlərə efir vaxtı ayıra bilsin;

ATƏT-in Bakı Ofisinin rəhbəri Əli Bilgə Cankorel qeyd olunan dəyirmi masada hökumət, parlament, siyasi partiyalar, vətəndaş cəmiyyəti və beynəlxalq təşkilatların nümayəndələrinin aktiv iştirakını alqışlayıb: “ATƏT-in Bakı Ofisi bu tövsiyələrin həyata keçirilməsinə yardım göstərməyə hazırdır”.

APA