Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev və partiyanın funksionerləri beynəlxalq təşkilatların Azərbaycanda fəaliyyət göstərən ofislərinin rəhbərlərinin təşəbbüsü ilə bir sıra görüş keçiriblər. BAXCP mətbuat xidmətindən APA-ya verilən məlumata görə, ilk görüş ABŞ-ın Beynəlxalq Respublikaçılar İnstitutun Bakı ofisində keçirilib.
Görüşdə BAXCP-nin səlahiyyətli nümayəndələri seçkilərlə bağlı bir sıra məsələlər ətrafında müzakirələr aparıblar. Daha sonra ABŞ-ın Milli Demokratiya İnstitutunun (MDİ) Bakı ofisinin rəhbəri Arjen de Vulff BAXCP sədri ilə görüşüb. Partiyanın seçkilərə hazırlığı və digər məsələlər ətrafında fikir mübadiləsi aparılıb. /APA/

Oktyabrın 15-də Azərbaycanda keçiriləcək prezident seçkilərini izləyəcək MDB Müşahidə Missiyasının qərargahı rəsmi olaraq sentyabrın 16-da fəaliyyətə başlayacaq. Bu barədə APA-ya qərargahın üzvü Oleq Kuleba deyib.

Onun sözlərinə görə, sentyabrın 14-də qərargahın 3 üzvü artıq işə başlayacaq, sonra qərargahın digər üzvləri, o cümlədən Bakıda fəaliyyət göstərən MDB ölkələri səfirliklərindən akkreditə olunmuş müşahidəçilər prosesə qatılacaq və uzunmüddətli müşahidəçilərin sayı 25-30-a çatacaq. Seçkilər günü isə səsverməni 250 nəfərin izləyəcəyi gözlənilir. O. Kulebanın sözlərinə görə, Azərbaycanın bir neçə regionunda qərargahın şöbələrinin açılması da planlaşdırılıb.

Qeyd edək ki, qərargaha MDB İcraiyyə Komitəsinin seçkilər şöbəsinin rəhbəri Yevgeni Sloboda, Müşahidəçi Missiyasına isə MDB icra katibi Sergey Lebedev rəhbərlik edəcək. /APA/

Azərbaycan Yaşıllar Partiyasından prezidentliyə namizəd, partiyanın həmsədri Mais Güləliyev həftə sonu imza vərəqələrini Məkəzi Seçki Komissiyasına (MSK) təqdim edəcək. Bu barədə çərşənbə günü Trend News-a partiyadan bildiriblər.

Yaşıllar Partiyasından verilən məlumata görə, seçici imzalarının toplanması kampaniyası yekunlaşmaq üzrədir. Hazırda 65 dairədən 40 mindən artıq imza toplanıb və indi imza vərəqələrinin ilkin yoxlanılması aparılır. Seçki Qərargahının hazırladığı Təqvim Planına əsasən, avqustun sonunadək 43-44 min imzanın toplanılması gözlənilir.
/Trend/

Azərbaycanın müxalifətyönlü və sol təmayüllü Sosial Demokrat Partiyası prezident seçkisini boykot edən müxalifət partiyalarının yeni birliyinin yaradılmasında iştirak etməyəcəyini açıqlayıb.

«Müxalifətin birliyini yaratmaq heç bir nəticə verməyəcək və hazırda belə bir birlik yaratmaq mümkün deyil», çərşənbə günü Trend News-a Azərbaycan Sosial Demokrat Partiyasının (ASDP) həmsədri Araz Əlizadə bildirib.

Əlizadə müxalifətin yeni birliyində təmsil olunmaqla bağlı onlara müraciət olunmadığını bildirib.

«Bu təşəbbüslə çıxış edənlər bilirlər ki, bizə müraciət etsələr, rədd cavabı alacaqlar. Çünki ASDP belə oyunlarda iştirak etmir. Müxalifət prezident seçkisini şəraitin pis olmasına görə boykot etməyib. Onların bu addımı atmaları şəxsi ambisiyaları ilə bağlıdır və yaxşı bilirlər ki, seçki ən demokratik formada keçirilsə də, məğlub olacaqlar. Müxalifətin yeni birlik yaratması da şəxsi ambisiyalara görə baş tutmayacaq», - deyə həmsədr əlavə edib.

Əlizadə qeyd edib ki, indiyə qədər müxalifətin yaratdığı birliklər heç bir nəticə əldə etməyib. Onun fikrincə, boykot tərəfdarları yeni birlik yaratsalar belə, o, bir müddət sonra dağılacaq.
/Trend/

Oktyabrın 15-də Azərbaycanda keçiriləcək prezident seçkilərini izləyəcək Müstəqil Dövlətlər Birliyinin (MDB) Müşahidə Missiyasına qurumun icra katibi Sergey Lebedev rəhbərlik edəcək. APA-nın məlumatına görə, bu barədə MDB-yə üzv ölkələrin daimi nümayəndələr Şurasının Minskdə keçirilmiş iclasında qərar qəbul olunub.

Müşahidə Missiyasına uzunmüddətli və qısamüddətli müşahidəçilər daxil olacaq. Uzunmüddətli müşahidəçilərin gələn ay Bakıya gələcəkləri gözlənilir. Missiyanın Azərbaycanda yaradılacaq seçki qərargahına isə MDB İcraiyyə Komitəsinin Seçkilər şöbəsinin rəhbəri Yevqeni Sloboda rəhbərlik edəcək. Y. Sloboda artıq bir neçə gün əvvəl Bakıda olub, MSK sədri Məzahir Pənahov, xarici işlər naziri Elmar Məmmədyarov və digər rəsmi şəxslərlə görüşüb.

Şuranın iclasında, MDB XİN başçıları və dövlət başçıları şuralarının oktyabrın 9 və 10-da Bişkekdə keçiriləcək iclaslarının gündəlikləri də təsdiq olunub. Nazirlərə müzakirə etmək üçün 26, prezidentlərə isə 18 məsələ təklif olunur. /APA/

“Azərbaycan Demokrat Partiyasının iştirakı olmadan müxalifətin hər hansı birliyi yarana bilməz. Çünki müxalifət deyəndə, ilk növbədə, nəzərə gələn birinci partiya ADP-dir. Biz imkan vermərik ki, Azərbaycan müxalifəti əvvəllər olduğu kimi, bu dəfə də yanlış kursla istiqamətləndirilsin”. Bu sözləri APA-ya açıqlamasında ADP sədri Sərdar Cəlaloğlu müxalifətin yeni koalisiyasında ADP-nin iştirak etməyəcəyi ilə bağlı fikirlərə münasibət bildirərkən deyib.

Onun sözlərinə görə, AXCP müxalifətin Azərbaycana müşahidəçi göndərməmək üçün beynəlxalq təşkilatlara müraciət etməsi təklifini irəli sürür: “Həmçinin, təklif edilir ki, seçkilərdən əvvəl onun nəticələrinin tanınmaması barədə mövqe bildirilsin. ADP isə hesab edir ki, indiki geopolitik vəziyyətdə, həm də bundan əvvəlki təcrübələrə əsasən, bu, yol səhvdir. Biz iqtidara əlavə təzyiqlər təşkil etməklə, əksinə Azərbaycan dövlətçiliyinə ziyan vururuq. Digər tərəfdən, beynəlxalq müşahidəçilərin gəlişinin qarşısını almaq mexanizmi yoxdur. Buna görə də hər iki təklifin gündəmdən çıxarılmasını, müxalifətin daha çox dövlətçiliyi müdafiə etməsi ilə bağlı işbirliyinin yaranmasını təklif etmişik. Bu isə dostlarımızın xoşuna gəlmir”.

AMİP-in mətbuat və təbliğat katibi Əli Orucov da AMİP olmadan hər hansı koalisiyanın perspektivinin olmadığını düşünür. Onun sözlərinə görə, AMİP bu koalisiyadan kənarda qalmayıb, sadəcə partiya özü bu birliyə qoşulmaq istəmir: “Əslində, bizi heç kim kənarda saxlaya bilməz, biz özümüz bu koalisiyada iştirak etmək fikrində olmamışıq. Mövqelərimizdə fərqlər olduğundan belə bir koalisiyada iştirakın tərəfdarı deyilik”.

Bu koalisiyanın yaradılmasının strateji hədəflərə deyil, seçkilərə hesablandığını deyən Ə. Orucov belə birliklərdə iştirak etmək istəmədiklərini vurğulayıb: “Çünki hədəfi bəlli olmayan, ideoloji əsaslar üzərində qurulmayan hər hansı birlikdə təmsil olunmaq məqsədəuyğun deyil. Belə koalisiyaların həm ömrü qısa olur, həm də bu birlik nəticə vermədən dağıldıqda orada təmsil olunanlar qarşılıqlı ittihama keçirlər. Bu isə cəmiyyətdə bir qədər də ruh düşkünlüyü yaradır. AMİP olaraq bu koalisiyanın perspektivini görmürük”.
/APA/

Azərbaycanda prezident seçkilərinin keçiriləcəyi gün - oktyabrın 15-i qeyri-iş günüdür. Bu barədə APA-ya Mərkəzi Seçki Komissiyasının (MSK) mətbuat xidmətinin rəhbəri Azər Sarıyev deyib. Onun sözlərinə görə, səsvermə iş gününə - çərşənbəyə təsadüf etsə də, Seçki Məcəlləsinin 8.2-ci maddəsinə uyğun olaraq, səsvermə günü seçki keçirilən ərazidə iş günü hesab edilmir.

Qeyd edək ki, Konstitusiyanın 100-102-ci maddəsinə görə, Azərbaycanda prezident seçkiləri 5 ildən bir, prezidentin səlahiyyət müddəti başa çatdığı ilin oktyabr ayının üçüncü həftəsinin çərşənbə günü keçirilir.
/APA/

Azərbaycan müxalifətini təmsil edən Milli Birlik Hərəkatnın lideri və «Azadlıq» blokunun həmsədri Lalə Şövkət hesab edir ki, müxalifətin birliyi və əməkdaşlığı səmimi olmur.

«Ona görə də müxalifətin əməkdaşlığı uzun müddət davam etmir» - çərşənbə günü Trend News-un müxalifətin yeni birliyinin yaradılmasının mümkünlüyü ilə bağlı sualını cavablandıran Lalə Şövkət bildirib.

Onun fikrincə, müxalifətin birliyinin yaradılması sosial sifarişdir. Şövkət qeyd edib ki, eyni zamanda, real müxalifət partiyaları seçkini boykot edəndən sonra əməkdaşlıq məsələsi aktuallaşıb.

«Mən həmişə birliyin tərəfdarı olmuşam. Amma real qüvvələrin və səmimi birliyin tərəfdarıyam» Şövkət əlavə edib.

O hesab edir ki, müxalifətin yeni birliyi prezident seçkisinə münasibət üzərində qurulmalıdır.

«Hazırkı vəziyyətdə müxalifətin birliyinə daha çox ehtiyac var və buna önəm verilməlidir. Lakin birlik funksional olmalı və müəyyənləşdirilmiş mövqe üzərində qurulmalıdır. Hesab edirəm ki, bu mövqe prezident seçkisinə münasibətdən irəli gəlməlidir», - deyə Şövkət əlavə edib.

Onun fikrincə, yeni əməkdaşlıq mərkəzinin yaradılmasında tələskənliyə yol vermək olmaz.

Azərbaycan Demokrat və Milli İstiqlal partiyalarının yeni birliyin yaradılmasında iştirak etməməsinə münasibət bildirən Şövkət deyib ki, yeni əməkdaşlığın yaradılmasında daha çox partiyanın iştirak etməsini istəyir: «Bu gün əməkdaşlığın səmərəsindən daha çox, partiyaların mövqeyi əhəmiyyət daşıyır. Seçkini boykot edən qüvvələr bəyan ediblər ki, prosesdə iştiraka şərait yoxdur. Əgər buna görə seçki boykot olunubsa, partiyaların mövqeyi də vəziyyətin və şərtlərin qiymətləndirilməsilə uyğun olmalıdır. Başqa mövqe ola bilməz. Daha çox partiya əməkdaşlıq məsələsində mövqe bildirsə, daha yaxşı olar. Amma hansısa partiya bundan imtina edibsə, bu da onların öz hüquqlarıdır». /Trend/

Ümid Partiyasının sədri İqbal Ağazadə ABŞ-ın Milli Demokratiya İnstitutunun (MDİ) Bakı ofisinin rəhbəri Arjen de Vulff ilə görüşüb. Partiyanın mətbuat xidmətindən APA-ya verilən məlumata görə, görüşdə A. Vulff Seçki Məcəlləsinə edilən əlavə və dəyişikliklər, partiyanın seçki prosesinə münasibəti, imzatoplama kampaniyası zamanı regionlarda və paytaxtda baş verənlərlə maraqlanıb. Azərbaycanda seçki situasiyası ilə bağlı ilkin təəssüratlarını bölüşən MDİ nümayəndəsi vətəndaş cəmiyyətinin qurulması prosesində siyasi partiyaların rolu, hər iki təşkilat arasında gələcək əməkdaşlıq perspektivləri barəsində fikir mübadiləsi aparıblar. A.Vulff seçki təbliğatı zamanı rəhbərlik etdiyi qurumun təcrübəsinin Ümid Partiyası Seçki Qərargahı üzvləri ilə bölüşdürülməsi və partiyanın gələcək siyasi fəaliyyət planları ilə bağlı öz təkliflərini bildirib.

Mərkəzi Seçki Komissiyası (MSK) seçiciləri oktyabrın 15-də keçiriləcək prezident seçkilərində iştiraka çağıran 2 fərqli plakat hazırlayıb. Qurumun mətbuat xidmətindən APA-ya daxil olan məlumata görə, hər biri 20 min tirajla çap olunan plakatların artıq aşağı seçki komissiyalarına paylanmasına başlayıb. MSK seçicilərin səsverməyə çağırışı ilə bağlı səsvermə gününə kimi digər tədbirlər də həyata keçirməyi planlaşdırır.
/APA/

Azərbaycanın iqtidaryönlü Ana Vətən Partiyası (AVP) prezident seçkiləri ilə bağlı tədbirlər planı hazırlayıb.

«Mənim rəhbərliyim ilə seçkilərdə təbliğat-təşviqat dövründə hansı formada iştirak etmək, hansı metodlardan yararlanmaqla bağlı tədbirlər hazırlanıb. AVP seçkiləri müşahidə edəcək və bunun üçün partiya üzvləri ayrılacaq», çərşənbə axşamı Trend News-a AVP sədri, millət vəkili Fəzail Ağamalı bildirib.

Avropa Şurasının eksperti Paskal Muni hesab edir ki, seçkilər dövründə mətbuatın əsas vəzifəsi siyasətçilərin bəyanatlarını yaymaq deyil, vətəndaşların istədikləri məlumatları onlara çatdırmaqdır.

«Medianın bütün tərəflərə bərabər şərait yaratması vacibdir», çərşənbə axşamı Bakıda keçirilən konfransda Avropa Şurasının eksperti bildirib.