Azərbaycanın müxalifət Vəhdət Partiyası hakim Yeni Azərbaycan Partiyasının (YAP) prezidentliyə namizədi, indiki dövlət başçısı İlham Əliyevin müdafiəsi ilə bağlı qərar qəbul etmək niyyətindədir.

«Partiyanın Baş Məclisinin avqustun 16-da keçiriləcək iclasında siyasi kursumuza uyğun qərar veriləcək və yəqin ki, bu qərar İlham Əliyevin müdafiəsi ilə bağlı olacaq» - çərşənbə günü Trend News-a Vəhdət Partiyasının sədri Tahir Kərimli bildirib.

ABŞ -ın Beynəlxalq Respublikaçılar İnstitutu (BRİ) Azərbaycanda keçiriləcək prezident seçkisində «exit-poll» həyata keçirməyəcək.
«Kifayət qədər maliyyə yardımı olmadığından, seçkilərdə «exit-poll» aparılmayacaq»,- çərşənbə günü Trend News-a BRİ-nin Azərbaycan nümayəndəliyinin Siyasi Proqramlar üzrə rəhbəri Tural Əhmədov bildirib.

Azərbaycanda məhkəmənin qərarı ilə qeydiyyatı ləğv olunmuş Seçki Monitorinq Mərkəzi (SMM) dövlət qeydiyyatına alınması üçün Ədliyyə Nazirliyinə müraciət edib, çərşənbə günü Trend News-a SMM-dən məlumat verilib.
SMM 2008-ci ilin fevralında Ədliyyə Nazirliyində qeydiyyata alınsa da, bundan iki ay sonra nazirlik SMM-in qeydiyyatının etibarsız sayılması və ləğvi iddiası ilə Xətai rayon məhkəməsinə müraciət edib.

Azərbaycanın müxalif Müsavat Partiyasının üzvü, «Yeni Müsavat» qəzetinin baş redaktoru hesab edir ki, seçkidə iştirakdan imtina edən partiyaların birgə sammiti keçirilməlidir.

«Müsavat hələ bir neçə ay bundan əvvəl də belə bir sammitin keçirilməsi təklifini vermişdi, amma bu təklif o zaman reallaşmadı. İndi proseslər müxalifətin sammitinin təcili olaraq keçirilməsini zəruri edir», çərşənbə günü Trend News-a Rauf Arifoğlu bildirib.

Müxalif Azərbaycan Xalq Cəbhəsi Partiyası (AXCP) Ali Məclisinin keçmiş sədri Qulamhüseyn Əlibəyli yeni partiya yaratmaq niyyətindədir.
«Mənim partiya yaradacağım istisna olunmur. Əgər bu baş versə, yaradacağım partiyanın dəst-xətti parlament tipli olacaq», çərşənbə axşamı Trend News-a Əlibəyli bildirib.
Əlibəyli xatırladıb ki, artıq o, qarşıdan gələn prezident seçkilərində iştirak barədə qərar verib və müvafiq sənədləri Mərkəzi Seçki Komissiyasına təqdim edib. «Seçki prosesi zamanı mənim partiya yaratmaqla bağlı planlarım dəqiqləşəcək.

Azərbaycanın müxalif Açıq Cəmiyyət Partiyası (ACP) hesab edir ki, müxalif düşərgənin əksər partiyalarının prezident seçkilərində iştirakdan imtina qərarları seçkiqabağı şəraitlə bağlı deyil.

«Mən seçkiqabağı şəraitin demokratiki olmaması kimi bəyanatları bəhanə hesab edirəm. Azərbaycan müxalifətinin seçkiləri boykot etməsi əvvəlcədən düşünülməyib və müəyyən bir taktika kimi ortaya çıxmayıb, sadəcə müxalifət bu yola getməyə məhkum olub», çərşənbə axşamı Trend News-a ACP-nin İdarə Heyətinin üzvü, partiya liderinin müşaviri Zəminə Dünyamalıyeva deyib.

Azərbaycanın Mərkəzi Seçki Komissiyası (MSK) ictimaiyyəti seçici siyahılarının dəqiqləşdirilməsində yaxından iştirak etməyə çağırıb.

«Seçici siyahılarının dəqiqləşdirilməsi səsvermə gününə qədər mümkün olacaq. Siyasi mövqeyindən asılı olmayaraq, hamı bu məsələdə aktiv olmalıdır» - çərşənbə axşamı jurnalistlərə MSK-nın sədri Məzahir Pənahov bildirib.

Azərbaycanın Mərkəzi Seçki Komissiyası çərşənbə axşamı Azərbaycan prezidentliyinə beş namizədin səlahiyyətli nümayəndələrini təsdiqləyib.

Azərbaycanın Bütöv Xalq Cəbhəsi Partiyasının sədri Qüdrət Həsənquliyev, Ümid partiyasının sədri İqbal Ağazadə, Müasir Müsavat partiyasının sədri Hafiz Hacıyev, Azərbaycanın Liberal-Demokrat Partiyasının sədri Fuad Əliyev və Yaşıllar Partiyasının sədri Mais Güləliyevin MSK- dakı səlahiyyətli nümayəndələri təsdiq edilib.

Solçu Azərbaycan Sosial-Demokrat Partiyasının çərşənbə axşamı keçirilən iclasında prezident seçkilərində iştirakla bağlı yekun qərar vermək mümkün olmayıb. «Müzakirələrdən sonra belə qərara gəlindi ki, bu məsələ rayon təşkilatlarının müzakirəsinə verilsin. Beş gün ərzində rayon təşkilatlarında müzakirələr başa çatdırılacaq və Mərkəzi Plenum yekun qərarını verəcək», - bunu Mərkəzi Plenumun iclasından sonra Trend News-a ASDP sədri Araz Əlizadə bildirib.

Müxalifyönlü Azadlıq Partiyası oktyabrın 15-də keçiriləcək prezident seçkilərində iştirak etməklə bağlı qərarını dəyişib. Partiyanın mətbuat xidmətindən APA-ya daxil olan məlumata görə, Ali Məclisin bugünkü toplantısında prezident seçkilərində iştirak etməmək barədə qərar qəbul edilib. Azadlıq Partiyası digər müxalifət təşkilatlarının seçkilərə qatılmadığını, demokratik seçki mühitinin olmadığını əsas gətirərək bu addımı atıb.