Azərbaycanda tanınmış müxalifət liderlərinin və bitərəf siyasətçilərin təmsil olunduğu yeni qurumun yaradılması nəzərdə tutulur.

«Mənim tərəfimdən məşhur siyasətçilərdən, bitərəflərdən ibarət mərkəzin yaradılması təklifi hazırlanıb. Təxminən 10-15 fərdin bir araya gəlməsi və ümumdemokratik hərəkatın başlanmasını, bunun yönləndirilməsini mümkün hesab edirəm. Daha çox bu istiqamətdə düşünürəm və fərd olaraq bəzi şəxslərlə danışıqlarım olub», cümə axşamı Trend News-a müxalifətdən olan millət vəkili, Müsavat deputat qrupunun üzvü Pənah Hüseyn məlumat verib.

Hakim Yeni Azərbaycan Partiyası (YAP) hesab edir ki, prezident seçkilərində iştirakdan imtina ənənəvi müxalifət daxilində ciddi fəsadların yaranmasına təkan verib.

«Bu proses müxalifətin daha da zəifləməsi ilə nəticələnəcək və artıq bunu müşahidə etməkdəyik»,- cümə axşamı Trend News-a YAP Siyasi Şurasının üzvü, millət vəkili Aydın Mirzəzadə son vaxtlar seçkidə iştirakdan imtina edən partiyalarda müşahidə olunan bəzi istefaları şərh edərkən bildirib.

Azərbaycan Mərkəzi Seçki Komissiyası (MSK), Xarici İşlər Nazirliyi və Milli Məclis oktyabrın 15-də keçiriləcək prezident seçkilərinin müşahidəsini aparmaq üçün bir sıra beynəlxalq təşkilata rəsmi dəvət göndərib.

Bu barədə APA-ya MSK-nın beynəlxalq əlaqələr şöbəsinin müdiri Rövzət Qasımov məlumat verib. Onun sözlərinə görə, ATƏT, ATƏT-in Parlament Assambleyası, Müstəqil Dövlətlər Birliyi, Avropa Şurasının Parlament Assambleyası dəvətlilər sırasındadır.

Beynəlxalq Respublikaçılar İnstitutunun (BRİ) təşkilatçılığı ilə Lənkəranda prezident seçkiləri ilə bağlı maarifləndirici seminar – treninq keçirilib. APA-nın cənub bürosunun məlumatına görə, bölgədə fəaliyyət göstərən siyasi partiyaların, hökumət və qeyri-hökumət təşkilatlarının nümayəndələrinin qatıldığı ikigünlük tədbirdə BRİ-nin Azərbaycandakı siyasi proqramlar üzrə rəhbəri Tural Əhməd çıxış edərək seminarın əsas məqsəd və prinsiplərindən söz açıb.

Azərbaycanda daha iki nəfər prezidentliyə namizədliyini irəli sürüb. Mərkəzi Seçki Komissiyasının (MSK) mətbuat xidmətindən APA-ya daxil olan məlumata görə, “Mədəniyyət” qəzetinin məsləhətçisi Teymur Quliyev və “Ekspertiza” qəzetinin baş redaktoru Süleyman Quliyev namizədliklərinin təsdiq olunması üçün bu gün MSK-ya müraciət ediblər. Qanuna müvafiq olaraq 5 gün müddətində adıçəkilən şəxslərin müraciətinə baxılıb cavab veriləcək.

“Qulamhüseyn Əlibəylinin AXCP-dən istefa verməsinə təəssüflənir, bunu həm özüm, həm də partiya üçün itki hesab edirəm”. Bu sözləri APA-ya açıqlamasında Azərbaycan Xalq Cəbhəsi Partiyasının (AXCP) sədri Əli Kərimli deyib. O, Q. Əlibəylinin istefasına baxmayaraq, partiyanın öz siyasi xəttinə sadiq qaldığını qeyd edib: “Biz öz siyasi xəttimizdə, tutduğumuz mövqedə israrlıyıq. Bu yolda itkilərə, məhrumiyyətlərə, təzyiqlərə məruz qalsaq da, öz siyasi xəttimizi davam etdirəcəyik”.

Mərkəzi Seçki Komissiyasının (MSK) sədri Məzahir PənahovABŞ-ın Milli Demokratiya İnstitutunun (MDİ) Azərbaycan üzrə direktoru Arien de Vulfla görüşüb. MSK-nın mətbuat xidmətindən APA-ya daxil olan məlumata görə, görüşdə M. Pənahov rəhbərlik etdiyi qurumun fəaliyyəti haqqında danışıb, komissiyanın ATƏT, Avropa Şurası, Seçki Sistemləri üzrə Beynəlxalq Fond və bu kimi digər beynəlxalq təşkilatlarla əməkdaşlıq etdiyini bildirib. M. Pənahov ölkədə keçirilən bütün seçkiləri beynəlxalq qurumların yüzlərlə təmsilçisinin müşahidə etdiyini vurğulayıb.

Azərbaycanın Milli Qeyri - Hökumət Təşkilatları Forumu (MQF) Azərbaycanda keçiriləcək prezident seçkiləri ilə bağlı tədbirlər planı hazırlayıb. «MQF seçkilərin daha demokratik keçirilməsi və seçici fəallığının artırılması üçün tədbirlər həyata keçirəcək»,- çərşənbə günü Trend News-a MQF prezidenti Rauf Zeyni bildirib.

ABŞ - parlamenti separatçı Dağlıq Qarabağ rejiminə yardım göstərən yeganə ölkədir,- Milli Məclisin beynəlxalq münasibətlər və parlamentlərarası əlaqələr üzrə daimi komissiyasının sədr müavini, Azərbaycanın AŞPA-dakı nümayəndə heyətinin üzvü Gültəkin Hacıyeva bildirib.

“Müstəqillik əldə etməklə biz gördük ki, real Amerika bizim şüurumuzda ideallaşdırdığımız Amerikadan fərqlənir”, - o bildirib.

Oktyabrın 15-də keçiriləcək prezident seçkiləri ilə bağlı 4 qeyri-hökumət təşkilatı “Seçki 2008” adlı QHT Koalisiyası yaradıb. APA-nın məlumatına görə, koalisiyaya “İnam” Plüralizm Mərkəzi, “Multimedia” İnformasiya Sistemləri və Texnologiyaları Mərkəzi, Beynəlxalq Avrasiya Mətbuat Fondu, Orta Asiya və Güney Qafqaz Söz Azadlığı Şəbəkəsi daxil olub. Koalisiyanın koordinatoru, “İnam” Plüralizm Mərkəzinin direktoru Vahid Qazi bildirib ki, Azərbaycanda keçirilən seçkilərin heç birində bu ilki qədər passivlik olmayıb.

Ədalət Partiyasının sədri, millət vəkili İlyas İsmayılov oktyabrın 15-də keçiriləcək prezident seçkilərində iştirak etməmək barədə qərar qəbul edib. Partiya sədrinin müavini Elxan Şükürlü APA-ya bildirib ki, İ. İsmayılov oğlu Etimad İsmayılovun Rusiyada həbsi ilə əlaqədar hazırda Moskvada olduğundan seçki kampaniyasında iştirak etmək imkanı yoxdur: “İlyas İsmayılov seçkilərə namizəd olaraq qatılmaq fikrində idi, lakin Etimad İsmayılovun həbsi onun fikrini dəyişməsinə səbəb oldu”.

Müxalif Azərbaycan Xalq Cəbhəsi Partiyasının (AXCP) Ali Məclisinə yeni sədr seçilməsi partiyanın qurultayına qədər təxirə salına bilər. «Biz çalışırıq ki, bu ilin sonuna kimi qurultayımızı keçirək. Qurultayda Ali Məclis üzvləri yenidən seçiləcək və bu baxımdan, Ali Məclisə sədr seçkisi qurultayda baş tuta bilər» - deyə çərşənbə günü Trend News-a AXCP-nin sədr müavini Fuad Müstafayev bildirib.

AXCP-nin Ali Məclisinin sədri Qulamhüseyn Əlibəyli ötən həftənin cümə günü partiyadan və tutduğu vəzifədən istefa verib.